Inatsit tunngaviusoq

Ataani atuarneqarsinnaapput meerartaarnermut atatillu inatsisit.

 

Paasissutissat sukumiinerusut uani Naartunermi, erninermi meeravissiartaarnermilu sulinngiffeqartarneq pillugu Inatsisartut inatsisaat nr. 5 19. novembari 2020-meersumi atuarneqarsinnaapput.

 

Meerartaarnermut atatillugu sulinngiffeqarnermut ullormusiat il.il.

Ernereernermi ullormusiaqartitsineq pisarpoq ernisimalluni sulinngiffeqarnermi isertitaqarunnaarsimagaanni. Ullormusiaqarsinnaatitaaneq akissarsiaqarlutik sulisunut, namminersortunut taakkulu aapparisaannut pilersueqataasunut soorlu aalisartunut, piniartunut savaatilinnullu aammalu ilinniagaqarsimallutik naammasserlaanut ilinniarnissamullu ilinniarfinnut aalajangersimasunut qinnuteqarsimasunut atuuppoq. Ullormusiat annertussusaat ilinniagaqarsimanngitsunut akunnermut aki ilanngaatitaqanngitsoq malillugu annerpaamillu sapaatip akunneranut akunnernut 40-nut annertussusilinnut naleqqussagaavoq.

 

Ernereernermi ullormusianut atuutsinneqartut tassaapput:

 

·       Naartusoq erninissamut naatsorsuutigisamit sapaatip akunneri sisamat sioqqullugit sulinngiffeqarsinnaatitaavoq.

·       Meerartaarnermi anaanaasoq ernereernerup kingorna sapaatip akunnerini 15-ini sulinngiffeqarsinnaatitaavoq kiisalu marlulissanik meerartaarnermi imaluunniit amerlanerusunik meerartaarnermi ernereernerup kingorna sapaatip akunnerini 19-ini sulinngiffeqarsinnaatitaalluni.

·       Ataataasoq meeqqap/meeqqat inunngoreerneranniit sapaatip akunneri pingasut sulinngiffeqarsinnaatitaavoq.

·       Angajoqqaat, tassa imaappoq nammineq toqqakkamik angajoqqaajusoq, meerartaarnermi ernereernerup kingorna aamma sapaatip akunneri 21-t sulinngiffeqarsinnaatitaavoq kiisalu marlulissanik arlalinnilluunniit meerartaarnermi ernereernerup kingorna aamma sapaatip akunneri 25-t sulinngiffeqarsinnaatitaalluni (angajoqqaat sulinngiffeqarsinnaanerannut inatsit malillugu).

 

Meerarsiartaarnermi aamma meeqqamik ulloq unnuarlu paarsinermi meerartaarnermut atatillugu sulinngiffeqarnermut ullormusiaqartitsisoqartarpoq.

 

Meerartaarnermi sulinngiffeqarnerup takissusaa 2009-mi kisitsisitigut paasissutissat kisitsisaataasivimmi kisitsisaatigineqalernerisa kingorna allanngoqattaarnikuuvoq.

 

2021-p qiteqqunnerani ernereernermi aningaasaateqarfik Amaat nutaanik malittarisassaqalerpoq. Tamatuma kingunerisaanik namminersortuni suliffeqartut inatsisit tunngavigalugit aningaasaateqarfimmit Amaamit aningaasaliiffigineqartalerput ernereernermi ullormusianik tunineqassaarlutik.

 

Nalunaarsuutit tunngaviusut aamma suliarineri

Kisitsisitigut paasissutissanut tunngaviusut pisortaqarfiit ataatsimoorussamik aningaasarsianut, Naatsorsueqqissaartarfiup innuttaasunut nalunaarsuiffianninngaanneersuupput.